36 tauhan ng BI sa holding facilty, sibak

TINITIYAK ni Bureau of Immigration (BI) Commissioner Norman Tansingco na ang bagong team sa holding facility nito sa Taguig ay nagpapataw na ngayon ng heightened security alert sa nag-iisang major holding center sa bansa para sa mga deportee.

Personal na nagtungo si Tansingco sa pasilidad upang mag-isyu ng kanyang mga marching order at tiyaking susunod ang bagong team, at binigyang diin ang mga pangangailangan para sa pagpapabuti sa mga sistema at pasilidad.

Ayon kay Tansingco, matapos ang isinigawang inspection sa mga pasilidad, nakakita sila ng pagkakataon upang mas maisaayos ang mga pasilidad at nangakong uunahin ang modernasisyon ng Bureau of Immigration Ward Facility. (BIWF)

Kaugnay nito, nagsisilbing temporary holding facility ang Bureau of Immigration Ward Facility ng mga dayuhan na nakatakdang i-deport, at matatagpuan sa loob ng Camp Bagong Diwa sa Bicutan, Taguig.

Sa panahon ng inspeksyon, nailipat ang pamamahala ng pasildad sa bago nitong pinuno na si Intelligence Officer II Leander Catalo.

Nauna nang inalis ni Tansingco ang dating hepe nito, kabilang ang 35 pang tauhan, at inilipat sila sa ibang back-end offices habang naghihintay ng imbestigasyon.

Ang imbestigasyon ay nagmula sa susprise raid noong Enero 30 na isinagawa ng mga operatiba ng intelligence division ng Bureau of Immigration, sa tulong ng National Capital Region Police Office, na nagresulta sa pagkakumpiska ng mga unauthorized cellphone at gadget, undeclared money, sigarilyo, matutulis na bagay, at construction materials.

Pinahihintulutan ng patakaran ng immigration ang paggamit ng mga cellphone ng mga foreign ward upang makipag-ugnayan sa mga opisyal ng embahada, kanilang legal na tagapayo o kanilang pamilya.

Matapos ang naturang raid, agad na ipinag-utos ni Tansingco na ihiwalay ang mga dayuhang pugante sa iba pang deportee.

Sinabi pa ni Tansingco, ang mga pugante ay nangangailangan ng higit na seguridad at mas mahigpit na mga regulasyon, kumpara sa mga may mas kaunting o mas mababang mga pagkakasala.

Una na rito, ibinahagi ni Commissioner Tansingco na naisumite na nila sa Department of Justice (DoJ) ang ulat ng naturang raid.(Jerry Tan)