Sugal lupa ilang taon ng laganap sa Laguna at Batangas (PART-4)

LUMALABAS na walang silbi ang batas laban sa iligal na sugal mula nang amyendahan ang Presidential Decree (PD) 1602 noong 2004 ay wala pang naipakulong na mga gambling operator at protektor nito.

Matatandaan sa naging pagdinig ng House Committee on Public Order and Safety, hindi naitago ni Santa Rosa Laguna Rep. Dan Fernandez ang kanyang pagkadismaya na sa kabila ng mataas na penalty sa gambling operators at mga protector nito, ay wala pang nakukulong kahit lantad ang iligal na sugal partikular ang probinsiya na kanyang kinakatawan kung saan gabi-gabi nagpupuyat ang mga kabataan, padre de pamilya, ilaw ng tahanan, adik, tulak ng droga at mga sugarol na inu-umagang nagsusugal ng “color games at drop ball baraha” na ginagamit bilang front ay Peryahan na matatagpuan partikular sa bakuran ng Star Mall, Victory Central Mall, Target Mall at Tram Plaza Balibago Santa Rosa City, Laguna.

Bukod dyan inaabot din ng madaling araw ang mga kabataan na edad 12 anyos pataas na tumataya ng P500 hanggang P2,000 sa gabi-gabing sugal na “color games at drop ball baraha” na matatagpuan sa Barangay Lankiwa, Timbao, Sto Domingo at Biñan Public Market.

Untouchable din ang pamorningan na Pergalan o perya-sugalan na matatagpuan sa Barangay Mamatid at sa bayan ng Cabuyao mging sa Barangay Landayan San Pedro Laguna na pag-aari ng mga maimpluwensiyang gambling queen na alyas Judith, Baby P., Edu, Elmer at Rommel.

“Mabigat ang batas na ito, ‘yung Republic Act (RA) 9287, ang tanong sa PNP (Philippine National Police) at NBI (National Bureau of Immigration), meron na ba tayong naparusahan sa batas na ito na itinaas na natin ang penalty ng mga perpetrators ng illegal gambling meron na ba tayong naipakulong?” tanong ni Rep. Fernandez.

Ipinaliwanag din ng Kongresista na base sa nasabing batas na pinirmahan ng dating Pangulong Gloria Macapagal Arroyo noong Abril 2, ang mga mananaya ay maaaring makulong ng hanggang tatlong buwan habang 10 taong pagkabilanggo naman sa mga protektor.

Walong (8) taong pagkabilanggo naman sa mga tauhan ng gambling operator/lord at kukumpiskahin ang bahay, gusali, sasakyan na ginagamit sa operasyon ng ilegal na sugal.

Makukulong din ng hanggang 12 taon ang maintainer, manager at operator ng ilegal na sugal; hanggang 14 taon naman sa mga financier o kapitalista at 20 taon sa kanilang mga protektor sa gobyerno.

Kapag public official’s aniya, elected man o appointed, ay tatanggalin sa puwesto at hindi na papayagang pumasok sa public service.

Ilang dekada na ang nasabing batas ngunit wala pang gambling operators/lord at mga protektor na naipakukulong sa kabila ng pag-amyenda sa PD 1602 na nagtaas ng parusa sa mga sangkot sa ilegal na sugal.

Sa tindi ng parusang ito mistulang walang takot sa batas na ito (PD 1602) sina Santa Rosa Mayor Arlene Arcillas, Biñan Mayor Arman Dimaguisa, Santa Rosa City chief of police PLtCol Benson Pimentel, Biñan chief of police PLtCol Allan Reginald Basiya, Laguna PNP provincial director PCol Ricardo Dalmacia at Police Regional Office CALABARZON regional director Police Brig. General Paul Kenneth Lucas.
Matatandaang sa manifestation ni House Deputy Majority Leader at Senatorial aspirant Erwin Tulfo, nais nito na hindi lamang ang mga ilegal na sugal sa CALABARZON ang dapat imbestigahan kundi sa buong bansa at ipatatawag nito ang lahat ng regional director ng PNP para sa imbestigasyon.

Lahat ng aktibidad na may kaugnayan sa pagsusugal o pagtaya gamit ang pera ay mahigpit na ipinagbabawal alinsunod sa PD 1602 na inamyendahan ng RA 9287.

Hindi rin natin maintindihan na sa kabila ng kaliwat kanan na reklamo at sa ginawa nating pagbubunyag ay kung bakit napaka tahimik naman nina Gen. Lucas at Col Dalmacia sa isyu ng iligal na sugal na laganap sa kanilang hurisdiksyon.

Ayon pa sa sumbong mismong mga politiko at ang mga tagapagpatupad ng batas ang bumabalewala at bumababoy sa batas na PD 1602.

Sinabi nila, na mistulang nabili na ng mga bigtime at kilalang mga gambling operator sa Laguna ang “tsapa” ng mga nabanggit na PNP officials dahil sa ilang taon na itong pamamayagpag ma walang bumubulabog na animoy parang mga kabuteng naglipana sa lalawigan ni Governor Ramil Hernandez.

Sa kabila ng mga ginagawang pagdinig ng House Committee on Public Order and Safety laban sa iligal na sugal, ay nananatili parin ang presensiya ng lantarang sugal lupa sa hurisdiksyon ng mga nabanggit na opisyal ng gobyerno.

Batay sa sumbong na ipinarating sa pitak na ito ng ilang concerned citizen, tila nagiging kontrabida umano ang mga nabanggit na opisyal sa PD 1602 at RA 9287 dahil sa pangungunsinti ng mga ito sa iligal na sugal na naging dahilan ng paglobo ng kriminalidad.

Naniniwala din ang ilang sektor na bumabatikos dito na hindi matutuldukan ng mga matataas na PNP official ang talamak at lantad na mga PERGALAN (perya-sugalan) dahil ipinagmamalaki ng mga kilalang bigtime na mga gambling operator na alyas Judith, Elmer, Rommel, Edu, at Baby P. na kasangga nila ang mga opisyal sa Camp Vicente Lim at Camp Crame.

Samantala may impormasyon din tayong natanggap na hindi lamang sa Laguna talamak ang iligal na sugal na “color games at drop ball baraha” kundi maging sa lalawigan ng Batangas partikular sa Barangay Banaba San PascualBite Batangas, Buhay na Sapa San Juan, Barangay Inisloban, Barangay Lanatan Balayan, Barangay Tambo Lipa at Malvar Batangas, umano na pag-aari umano ng mga bigtime na gambling operator na alyas Jayson Tomboy, Jovel, Sheryl, Annie, at Yolly.
Ang tanong, ay kung paano ito nakakalusot kay Batangas provincial director PCol Jack Malinao.

Oh baka malaki ang “patong” ng mga nabanggit na mga gambling operator kaya nagiging bulag ang mga hepe ng kapulisan sa mga mini casino na sugalan na hindi bababa sa 10 lamesa ng “color games, baklay, beto-bito at drop ball baraha na nakalatag sa bawat peryahan”?

Calling attention PNP Chief, Police Director General Rommel Francisco Marbil at DILG Secretary Jonvic Remulla, mga Sir, your attention is badly needed.

Tutukan natin ito!

***

Kung may tanong, suhestiyon o komento ’wag mag-atubiling tumawag o mag-text sa numerong 0939-7177977 at 0936-8625001 o di kaya mag-email banderapilipino@yahoo.com/balyador69@gmail.com