Tulak todas sa drug buy-bust ops

Todas ang isang tulak ng droga nang makipagbarilan sa mga anti-narcotic cops sa Brgy. Tubgngod, Lagawe, Ifugao.

Una rito, nagsagawa ng buy-bust operation ang mga operatiba hanggang nakatunog ang isa sa dalawang suspek sa mga pulis at agad na nagpaputok sa kanila.

Iniulat ng Police Regional Office Cordillera (PRO CAR) na tinamaan ng bala ang isa sa mga pulis ngunit naprotektahan ito ng kanyang ballistic vest. Dahil dito, gumanti ng putok ang mga pulis at hinabol ang mga suspek na nagtangkang tumakas.

Matapos ang habulan, nadakip ang dalawang suspek, kung saan isa sa kanila ang nagtamo ng tama ng bala. Agad siyang isinugod sa Ifugao General Hospital ngunit idineklarang dead on arrival ng mga doktor.

Sa isinagawang pagsisiyasat sa sasakyan ng mga suspek, natagpuan ang humigit-kumulang 15 gramo ng shabu na nagkakahalaga ng P102,000. Bukod dito, narekober din ang apat na bala, isang basyong bala ng .22 caliber, at isang granada.

Ang hindi nasugatang suspek, na hindi pinangalanan ng mga awtoridad, ay agad na dinala sa kustodiya ng pulisya kasama ang mga nakumpiskang ebidensya.

Agad na sinampahan ng kasong paglabag sa RA 9165 o Comprehensive Dangerous Drugs Act of 2002 ang isang suspek na nahuli. (Rey Velasco)