VP Sara inaasahang siya na ang susunod na target ng ICC

INAASAHAN na ni Bise Presidente Sara Duterte na siya ang magiging susunod na target ng International Criminal Court (ICC) kasunod ng pag-aresto sa kaniyang ama na si dating Pangulong Rodrigo Duterte.

Ayon kay VP Sara, pinayuhan rin siya ng kaniyang ina na mag-ingat hinggil dito.

Subalit nakahanda aniya siyang harapin ang lahat ng mga alegasyon na ibinabato laban sa kaniya.

Sa katunayan, nagsimula na umanong maghanda ang kaniyang mga abogado maliban pa kay dating Pangulong Duterte na nauna ng nagpresentang maging abogado sa mga kasong kaniyang kinakaharap.

Sinabi pa ng Bise Presidente na mayroon silang libro bilang gabay sa kung ano ang kanilang gagawin at lahat ng kanilang research materials kaugnay sa ICC. Ibinahagi rin aniya nila ang kanilang drafted petition sa legal team ng dating Pangulo.

Inamin naman ng Ikalawang Pangulo na kaniyang inaalala ang magagastos para sa legal fees, bagama’t kasama naman aniya ito sa kanilang pinaghandaan.