Misis binoga ni mister dahil sa bolitas ng kumpare

Sugatan ang isang misis nang pagbabarilin at tagain ng mister dahil sa birong natikman nito ang bolitas ng kanilang kumpare sa bayan ng Toledo.

Kinilala ang biktima sa pangalan Marcy, 65, habang nadakip naman ang suspek na kinilala sa pangalan Rody, 70-anyos, magsasaka at kapwa residente ng Sitio Lower Bagdok, Barangay Sagay, ng naturang bayan.

Ayon kay Police Master Sgt. Alfredo De Gracia, imbestigador ng Toledo Police Station, 7:00 ng gabi nang maganap ang insidente sa naturang lugar.

Lumabas sa imbestigasyon ng pulisya, bago ang insidente nag-iinuman ang suspek at kanyang kumpare na nauwi sa biruan na usapan.

Biniro umano ang suspek ng kanyang kumpare na may bolitas ang ari nito at natikman pa ng kanyang misis at dinibdib niya ito.

Pag-uwi ng bahay ng suspek tinangka niyang makipagtalik sa biktima subali’t tinanggihan siya nito maski pa halik.

Lalong nagduda ang suspek kaya kinimpronta niya ang misis kung natikman nga nito ang bolitas ng kanilang kumpare at wala naman tumangging umamin si Marcy.

Dahil dito, kinuha ng suspek ang kanyang .38 revolver at pinagbabaril ang kanyang misis na tinamaan sa tiyan.

Hindi pa ito nakuntento at kumuha pa ng itak at pinagtataga niya ito sa iba’t-ibang parte ng katawan.

Agad naman dinala sa ospital ang biktima para lapatan ng lunas habang nadakip naman ang suspek ng mga rumespondeng pulis at narekober ang baril na ginamit at patalim.

Nahaharap ngayon sa kasong frustrated parricide at paglabag sa Comelec gun ban ang suspek.

Sa himpilan ng pulisya, inamin nito ang ginagawa sa kanyang misis dahil hindi niya napigilan ang galit sap ag-amin sa kanya ng biktima.