Martial law, term extension wala sa isip ni PBBM – ES Bersamin

NANINDIGAN ang Malakanyang nitong Martes na hindi bahagi ng agenda ni Pangulong Ferdinand R. Marcos, Jr. ang martial law at term extension kasunod ng reorganisasyon ng National Security Council (NSC).

Nauna nang naglabas ang Pangulo ng Executive Order 81 na muling nag-organisa ng NSC kungsaan inalis nito si Vice President Sara Duterte at mga dating presidente ng bansa.

Sa isang press briefing, sinabi ni Executive Secretary Lucas Bersamin na ang administrasyong Marcos ay nakatuon sa pagsusulong ng kaunlaran ng ekonomiya ng bansa, pagpapabuti ng kalusugan at kapakanan ng mamamayang Pilipino, at pagkumpleto ng kanyang mga legacy projects.

“Ang nasa isip niya ay ang kaunlaran ng ekonomiya ng bansa, kalusugan at kapakanan ng mga tao, lalo na ang mga nasa mababang uri, at ang pag-prioritize ng kanyang mga legacy projects,” diin ni Bersamin.

“Hindi ito tungkol sa martial law. Hindi ito tungkol sa pagpapalawak ng kanyang sarili sa kapangyarihan. Hindi, wala siyang iniisip tungkol doon. Ni hindi niya iniisip ang mga katagang iyon,”dagdag pa niya.

Ginawa ni Bersamin ang mga pahayag bilang tugon sa mga kritiko na kumukuwestiyon sa EO 81 na muling nag-organisa sa NSC.

Aniya, ang kapangyarihan ay nasa loob ng responsibilidad ng Pangulo na tiyakin na “ang sinumang magpapayo sa kanya ay nasa loob ng kanyang buong pagtitiwala at pagtitiwala. (Vanz Fernandez)