Kapuri-puring Laguna; Bakit si VP Sara lang ang nanga- ngailangan ng confi funds?

ANG lupang sinilangan ng ating Pambansang Bayani na si Dr. Jose Rizal ay tunay na namamayagpag na sa buong bansa sa ilalim ng platapormang “Serbisyong Tama” ni Governor Ramil Hernandez.

Muli’t muli ay pinatutunayan ni Gov. Hernandez na ang bunga ng may puso at serbisyong may integridad ay progreso at ginhawa para sa bawat mamamayan.

Kamakailan lamang, Agosto 23, 2024, ay pinarangalan ang Laguna bilang Top 2 Most Competitive Province ng Department of Trade and Industry (DTI) sa isang seremonya sa Manila Hotel.

“Rankings of Cities and Municipalities are based on the sum of their scores on 5 Pillars: Economic Dynamism, Government Efficiency, Infrastructure, Resiliency, and Innovation. Provincial rankings are based on population and income weighted average of the Overall scores of cities and municipalities under a province,” pahayag ng DTI.

Ang Lalawigan ng Laguna ay nakatanggap din ng pagkilala mula sa Department of Social Welfare and Development (DSWD) sa ika-73 anibersaryo ng departamento na ginanap sa Batangas City, Lalawigan ng Batangas, noong Pebrero ng taon, bilang Most Active Provincial Social Welfare and Development Office at Good Practice 2023.

Ayon sa DSWD, ginawaran ang Lalawigan ng Laguna ng nasabing mga parangal “because of its aggressive implementation of programs for the benefit of the underserved, and effective carrying out of the Serbisyong Tama Health Card, or Blue Card program, where Laguna was also declared regional winner.”

Noong Hulyo 10, 2024 naman, ang Lalawigan ng Laguna ay nakatanggap ng pagkilala mula kay Pangulong Ferdinand Marcos, Jr. bilang ‘Outstanding Development Partner for Southern Luzon on Improving Access to Markets Category’.

Ito ay ginanap sa 2024 Presidential Awards Ceremony for Micro, Small, and Medium Enterprises sa Malacanañang Palace.

Disyembre 13, 2023, ang Lalawigan ng Laguna ay pinarangalan ng Department of Interior and Local Government ng 2023 Seal of Good Local Governance (SGLG).

Ang Laguna ang kaisa-isahang lalawigan sa CALABARZON Region na nakatanggap ng nasabing prestihiyosong pagkilala.

Ayon sa DILG, ang pagbibigay ng SGLG Award sa Laguna “symbolizes the province’s journey towards good local governance by upholding the standards of transparency, integrity and service delivery.”

Napakaganda at tunay na kapuri-puri ang tuloy-tuloy na pag-angat ng Laguna. Maiging ituloy ang nasimulan nang Serbisyong Tama sa lalawigan. Mabuhayka, Gov. Ramil!

***

SI Bise Presidente Sara Duterte ay humaharap sa lumalaking kritisismo habang pinaiigting ng House of Representatives ang imbestigasyon sa paggamit ng kaniyang opisina ng confidential funds.

Sa ikalimang pampublikong pagdinig ng House Committee on Good Government and Public Accountability, isang tanong mula kay 2nd District Batangas Representative Gerville “Jinky” Luistro ang tumama sa ugat ng usapin: Nagkaroon ba ng confidential funds ang mga dating bise presidente bago si Duterte?

Kinumpirma ni dating OVP Chief Administrative Officer Kelvin Jerome Tenido na walang ganoong pondo si dating Bise Presidente Leni Robredo. Bagamat may ulat na nagkaroon ng confidential funds si dating Bise Presidente Jejomar Binay sa isang pagkakataon noong kanyang termino, hindi ito napatunayan at itinuturing na isang insidente lamang, na kaiba sa tuluy-tuloy at malaking alokasyon sa ilalim ni Duterte.

Ang rebelasyong ito ay nagbigay-liwanag sa pamumuno ni VP Duterte at nagtaas ng seryosong mga tanong: Bakit niya kailangan magkaroon ng confidential funds kung nagampanan ng kanyang sinundan ang tungkulin nang wala ito? Ang paggamit at paglalaan ng mga pondong ito ay nagpapakita ng isang administrasyong kumikilos ng may pag-iingat at pag-iwas. Hindi tulad ng kanyang mga naunang bise presidente na nagpapanatili ng transparency at nagpapahalaga sa pananagutan, ang pagtutulak ni VP Duterte para sa malalaking confidential resources ay nagpapakita ng administrasyong may mga nakatagong layunin.

Ang paggamit ng malaking halaga ng confidential funds ay hindi lamang kakaiba, kundi nakaaalarma rin. Sa halip na ilaan ang mga pondo para sa mahahalagang pampublikong serbisyo at transparent na mga programa, pinili ni VP Sara Duterte na bigyang-priyoridad ang mga pondo na nagbibigay sa kanyang opisina ng kalayaang kumilos ng walang masusing pagsusuri. Ang desisyong ito ay nagbigay-daan sa mga hinala na ang kanyang pamumuno ay umuusbong sa pag-iwas at pagtatago ng impormasyon mula sa publiko.

Kung hindi kailangan ng mga dating bise presidente ang mga pondong ito, bakit kailangan ito ni Sara Duterte? Ang pagtanggi ng Bise Presidente na magbigay-katwiran sa alokasyong ito at ipaliwanag ang mga nagastos sa pampublikong pagdinig ay nagpapalalim sa mga pagdududang ito. Ang kanyang pasimpleng pagturing sa imbestigasyon bilang “hindi kinakailangan” ay nagpapakita ng isang lider na ayaw magbigay ng paliwanag sa mga taong kanyang pinagsisilbihan.

Ang isyung ito tungkol sa confidential funds ay nagpapakita ng mas malaking problema: mas inuuna ba ni Sara Duterte na ilayo ang kanyang opisina sa pagsusuri kaysa maglingkod nang tapat sa publiko?

Sa nalalapit na halalan, mabilis na bumababa ang tiwala sa kanyang pamumuno. Binago ng iskandalong ito ang pananaw ng publiko at naglantad ng isang bise presidente na mas nakatutok sa pagprotekta sa kanyang mga interes kaysa sa paglingkod sa bayan. Mismo!