Bong Go: Amnestiya ni PBBM sa mga rebelde, landas sa kapayapaan

Nagpahayag ng suporta si Senador Christopher “Bong” Go sa desisyon ni Pangulong Ferdinand Marcos, Jr. na gawaran ng amnestiya ang mga dating rebelde at insurgents.

“I laud President Ferdinand Marcos, Jr., for granting amnesty to former rebels, including those presently charged or detained communist insurgents and secessionists,” ani Go.

Binigyang-diin ni Go na napakalungkot na masaksihan ang mga Pilipino na nagtutunggali dahil sa magkakaibang paniniwala at idiniin niya ang epekto nito sa pamilya ng mga namatay.

“Katulad ng sinasabi ko pa noon, masakit makita na ang mga Pilipino ay nakikipagpatayan sa kapwa Pilipino dahil lang sa pagkakaiba ng paniniwala sa buhay. Kung merong namamatay man na sundalo at rebelde, pinakakawawa dito ang mga naulilang pamilya nila,” ayon kay Go.

Ang amnestiya, sa ilalim ng Proclamations 403 hanggang 406, ay sumasaklaw sa mga dating miyembro ng grupong tulad ng Communist Party of the Philippines-New People’s Army-National Democratic Front (CPP-NPA-NDF), Revolutionary Proletarian Army-Alex Boncayao Brigade (RPMP-RPA-ABB), Moro Islamic Liberation Front (MILF), at Moro National Liberation Front (MNLF).

Ang mga krimen na kasama sa amnestiya ay rebelyon, pag-aalsa, at iba pang pagkakasala na ginawa dahil sa paniniwala sa pulitika.

Ang Executive Order No. (EO) 47, na nag-amyenda sa EO No. 125, ay nag-update sa papel ng National Amnesty Commission (NAC) sa pagproseso ng mga aplikasyon ng amnestiya.

Binigyang-diin ni Go na ang kahirapan, at kakulangan ng mga serbisyo ng gobyerno ay siyang ugat ng rebelyon.

Kaya naman patuloy niyang isinusulong ang pagpapabuti ng mga pabahay, edukasyon, kalusugan, agrikultura, at mga programang pangkabuhayan upang hikayatin ang mga rebelde na muling mamuhay nang mapayapa.

“Alam natin na ang kahirapan at kawalan ng serbisyo ng gobyerno ang kadalasang dahilan kung bakit may mga mamamayan tayong nagrerebelde,” ipinunto ni Go.

“Kaya’t itinaguyod ni dating Pangulong Rodrigo Duterte ang whole-of-nation approach para masolusyonan ang ilang dekadang paghahanap sa pangmatagalang kapayapaan sa bansa. Nagpapasalamat tayo na patuloy itong ipinatutupad ng administrasyon ni Pangulong Bongbong Marcos Jr.,” binanggit ni Go.

“Ilapit pa natin lalo na ang gobyerno sa kanila, ang mga serbisyo ng pamahalaan kahit sa pinakaliblib na mga komunidad,” iginiit ng senador.

Upang mailapit ang mga serbisyo ng gobyerno sa mga tao, bilang chair ng Senate Committee on Health and Demography, ay patuloy si Sen. Go sa pagsuporta sa pagtatatag ng mas marami pang Super Health Center sa buong bansa.

Itinaguyod din niya ang Republic Act No. 11959, na kilala bilang Regional Specialty Centers Act at ito ay nilagdaan na bilang batas ni Marcos noong Agosto 24.

Ipinaliwanag din ng mambabatas ang kahalagahan ng Balik-Loob Program, na pinangangasiwaan ng National Task Force to End Local Communist Armed Conflict (NTF-ELCAC), na naglalayong muling ibalik ang mga dating rebelde sa lipunan sa pamamagitan ng pagbibigay ng iba’t ibang uri ng tulong at legal na proteksyon.

Ang Balik-Loob Program, opisyal na kilala bilang Enhanced Comprehensive Local Integration Program (E-CLIP), ay isang pangunahing inisyatiba ng gobyerno ng Pilipinas. Pinamahalaan ng Task Force Balik-Loob (TFBL), pinupuri ng programa ang Armed Forces of the Philippines (AFP) sa kanilang papel sa positibong pagbabago sa buhay ng mga dating rebelde.