Oranza, Morales paborito sa Tour of Luzon

PAG-AAGAWAN nina Southeast Asian Games medalist Ronald Oranza at Jan Paul Morales ang karangalan at premyo kapag sumabak sa Tour of Luzon: Great Revival na magsisimula bukas Huwebes sa Paoay, Ilocos Norte.

Sina Oranza at Morales ang babandera sa International Cycling Union (UCI) continental team na Standard Insurance Philippines (SIP) sa eight-stage race na inihahandog ng MVP Group at inorganisa ng DuckWorld PH.

Si Oranza ay isang double bronze medalist sa Cambodia 2023 SEA Games at makakasama si Morales sa pagbandera sa SIP katuwang sina veteran Junrey Navarra, George Oconer, Ronald Lomotos, Jeremy Lizardo at Dave Cangayao.

Ang iba pang national team members na pepedal para sa kanilang mga tropa ay sina reigning national road champion Marcelo Felipe at Nichol Pareja (Victoria Sports Pro Cycling Team), Ruzzel Agapito (7-Eleven Click Roadbike Philippines), Joshua Pacsual (Excellent Noodles) at Julius Tudtud (DReyna Orion Cement).

Sina Steven Tablizo at Andrei Deudor ang gigiya sa Philippines Under-23 Tom N Toms team sa Tour of Luzon na pasisimulan ng opening ceremony sa harap ng world heritage site San Agustin (Paoay) Church.