‘NATUPAD’ NA PANGARAP? ANO ANG KASUNOD?

ANO mang araw, pormal nang uupo bilang bagong opisyal ng Bureau of Customs (BOC) si retired police general, Noel Estanislao.

Ito ay matapos siyang italagang ‘Collector VI’ ni Pang. Marcos Jr., noong Marso 11. Uupo siya bilang “hepe” ng ‘X-Ray Inspection Project’ (XIP), isa sa mga juicy, err, sensitibong posisyon sa Aduana.

Papalitan niya ang ating kaibigan na si Coll. Ronie Principe na inilipat bilang bagong ‘Director III’ ng ahensiya.

Kung mayroong aktwal na dibisyon na hahawakan si kaibigang Ronie, hindi pa natin alam. “Pakunsuwelo” yata kasi ang tawag dito, kasamang Jomar, hehehe!

‘Co-terminus’ ang posisyon ni Collector Estanislao. Ibig sabihin, aalis lang siya sa BOC sa pagbaba ni PBBM sa 2028—huwag lang siyempre siyang “sasabit” sa ano mang eskandalo, hehehe!

Ayon sa ilang kaibigan sa PNP at militar, ‘direct commission’ si Estanislao sa Philippine Constabulary (PC), nagpunyagi bilang pulis at sundalo hanggang makuha ang “bilib” ni PBBM bilang ‘personal martial arts instructor.’

Pinamunuan din umano ni Estanislao ang ‘TF Jericho’ noon ni SILG Joey Lina, na binuo laban sa ‘illegal gambling’ (jueteng). Katulad ng alam ng lahat, patuloy pa rin ang “pamamayagpag” ng jueteng hanggang ngayon.

Para naman sa mga miron, ‘dream come true’ (daw) ang pagpasok ni Estanislao sa BOC?

Sa totoo lang kasi, hindi pa man nakakaupo si PBBM noong 2022, aba’y “kalat” na ang “balita” sa pantalan na si Estanislao ang “susunod” na ‘customs commissioner,’ kapalit ni Comm. Jagger Guerrero, na siyang huling ‘BOC Chief’ sa administrasyong Duterte.

Subalit, katulad ng alam natin, si Comm. Yogi Ruiz ang naupong ‘commissioner’ hanggang pinalitan siya ni Comm. Bienvenido Rubio noong Pebrero 2023.

Sa kabila nito, hindi “natapos-tapos” ang “tsismis” sa pantalan na “uupo na” bilang ‘Commissioner of Customs’ si Estanislao. At ngayong “nakapuwesto” na siya, ano kaya ang “susunod” na kabanata, sabik na tanong ng mga miron.

Abangan natin ang mga susunod na kabanata!