Estudyante nangholdap ‘pambayad’ ng tuition

INARESTO ang 22-anyos na driver ng ride-hailing app nang pagnakawan at molestiyahin ang kanyang pasaherong babae sa Barangay Mambaling, Cebu City, Marso 12.

Ang salarin, isang second-year electrical technology student, ay huminto sa South Road Properties, kunwari upang umihi, bago tinutukan ang biktima ng screwdriver at nagdeklara ng holdap.

Kinuha nito ang iPhone 11 ng biktima na nagkakahalaga ng P20,000 at P2,500 na cash bago dinala sa isang madilim na lugar at minolestiya.

Matapos ang insidente, iniwan ng salarin ang biktima sa Barangay San Roque.

Nakunan ng biktima ng litrato ang plaka ng motorsiklo habang nasa isang gasolinahan.

Agad itong humingi ng tulong sa pulisya ng Mambaling, at naaresto ang salarin sa Balamban gamit ang GPS tracking.

Nabawi ang cellphone ng biktima, ngunit inamin ng salarin na nagastos na niya ang pera, aniya’y pinambayad sa matrikula.