HPG-PAG Rizal, Nanawagan ng Perpetual Ban sa Reckless Driver Matapos ang Trahedya sa Marilaque

Mariing kinokondena ng HPG-Provincial Advisory Group Rizal ang trahedyang naganap sa kahabaan ng Marilaque Highway na ikinasawi ni John Louie Arguelles at survivor na si Rico Buyawan. Dahil sa malagim na pangyayaring ito, nananawagan ang grupo sa Land Transportation Office (LTO) na permanenteng ipagbawal kay Buyawan ang pagkuha ng lisensya sa pagmamaneho, bilang babala sa ibang mga pabayang driver na naglalagay sa panganib ng buhay ng iba sa pampublikong lansangan.

“Ang pagmamaneho ay isang pribilehiyo, hindi isang karapatan. Ang sinumang hindi marunong gumamit nito nang may pananagutan ay hindi dapat bigyan ng pagkakataong ulitin ang kanilang kapabayaan,” pahayag ng grupo.

Hindi ito isang hiwalay na kaso—marami nang trahedya sa Marilaque dahil sa mga banggaan ng motorsiklo. Hindi ang kalsada ang problema kundi ang kakulangan sa pagpapatupad ng batas, imprastraktura, at sistematikong mga hakbang pangkaligtasan. Dahil dito, nananawagan ang HPG-PAG Rizal sa mga awtoridad na kumilos agad para sa matagal nang kinakailangang reporma:

Permanenteng Outposts at Checkpoints – Magtayo ng estratehikong mga outpost sa mga kritikal na lugar gaya ng Palo Alto, Manukan, at Devil’s Corner para sa real-time monitoring at mabilisang pagtugon sa mga pasaway na motorista.

Dagdag na Suporta para sa HPG – Kailangan ng Highway Patrol Group (HPG) sa Marilaque ng mas maraming tauhan, patrol vehicles, at speed monitoring equipment upang mas epektibong mapatupad ang batas sa kalsada.

Aktibong Pakikilahok ng LGU – Hindi sapat ang turismo lamang; dapat makialam ang mga lokal na pamahalaan sa pagpapatupad ng mas mahigpit na ordinansa, parusa, at pagpapatayo ng emergency infrastructure sa mga lansangan.

Marilaque bilang Traffic Discipline Zone – Magpatupad ng mas mahigpit na speed limits, regular na enforcement operations, mandatory safety briefings para sa group rides, at roadside CCTV monitoring upang gawing ligtas at responsable ang kultura ng pagmomotorsiklo.

Patuloy na isinusulong ng grupo ang kampanyang “Gawing Ligtas ang Marilaque: Chill Ride, Hindi Kill Ride!” upang matiyak na hindi magiging libingan ng mga riders ang Marilaque. Ang mga trahedyang maaaring maiwasan ay hindi dapat ipagwalang-bahala—dapat may managot!

“Hindi kami titigil sa pagsusulong ng reporma at paniningil ng pananagutan. Kung walang gagawin, baka ang susunod na biktima ay kaibigan natin, mahal natin sa buhay, o tayo mismo.”

Bilang bahagi ng kanilang panawagan, lumagda ang mga opisyal at miyembro ng HPG-PAG Rizal sa isang pormal na pahayag na nagpapahayag ng kanilang buong suporta sa mas mahigpit na pagpapatupad ng batas, mas matibay na mga hakbang sa kaligtasan, at ang kanilang paninindigan na gawing isang ligtas at responsableng riding destination ang Marilaque.

Nanatiling kaisa ang HPG-PAG Rizal sa mga inisyatiba ng pambansa at lokal na pamahalaan upang mas gawing ligtas ang Marilaque para sa lahat ng gumagamit nito.