73 kilo ng ‘damo’ nasabat ng PDEA at PNP sa La Union

UMABOT sa 73 kilos ng marijuana na nagkakahalaga ng P8.7 milyon ang nasabat ng pinagsanib na mga operatiba ng Philippine Drug Enforcement Agency (PDEA) Regional Office I at Philippine National Police (PNP) Region 1 sa isang abandonadong sasakyan sa Santol, La Union.

Kinilala ni PDEA RO 1 Director Joel B Plaza ang mga suspek na nag-abandona sa sasakyan na sina Felmen Day-os Aliles Jr. alyas “Dondon” at Amado Paycao alyas “Amado A. Gante Jr.”, kapwa residente ng Barangay Sasaba, Santol, na parehong at-large.

Ayon kay Plaza, isinailalim sa land interdiction ang mga suspek noong Enero 10, 2025 ngunit nakaramdaman ang mga ito na may mga operatibang nag-aabang sa kanila kaya’t iniwan ang kanilang sasakyan, na binantayan ng PDEA operatives nang ilang araw hanggang sa makakuha ng search warrant.

Nang bukasan ang abandonadong sasakyan (Mitsubishi Delica) 11:00 ng umaga ng January 13, nakita ang 73 piraso ng rolyo ng dahon ng marijuana. (Jimmy Mendoza)