‘Missing’ na PWD ginahasa at pinatay sa palayan

Hustisya ang panawagan ng mga kaanak ng 28-anyos na dalagang person with disability (PWD) nang madiskubreng patay na at ginahasa sa palayang bahagi ng Brgy. Balogo, Oas, Albay.

Hubo’t hubad nang matagpuan at pinatay sa sakal habang nakatihaya ang biktima na itinago lamang sa pangalang “Dorothy”, isang pipi at bingi, at residente ng Brgy. Maporong ng naturang bayan.

Sinabi ng pulisya na nawawala rin ang dalang wallet ng biktima nang madiskubre ang kanyang bangkay.

Sa ulat, noong hapon ng Hunyo 15 na nawawala ang biktima kaya laking gulat ng kanyang mga kaanak nang matagpuan ang dalaga kinaumagahan ng ilang residente na patay na sa gitna ng palayan sa katabing barangay.

Isinailalim na sa awtopsiya ang bangkay ng biktima upang makumpirma ang sanhi ng kanyang kamatayan habang patuloy ang imbestigasyon ng pulisya sa insidente upang matukoy ang salarin.