Buto ng tao bumara sa septic tank

NATAGPUAN ng mga awtoridad ang mga buto ng tao nang bumara sa septic tank ng isang bahay sa Doña Aurora, Quezon City, Huwebes ng umaga.

Sa report, 8:30 ng umaga (February 29) nang madiskubre ang kalansay ng tao sa poso negro sa No. 7 Serrano Laktaw St., Brgy. Doña Aurora.

Batay sa imbestigasyon ni SSg Dhonnie B. Peralta ng Quezon City Police District Criminal investigation and Detection Unit (QCPD-CIDU), nagtatanggal ng bara sa septic tank si John Christoper Guda nang makakuha ito ng mga buto ng tao.

Sa takot ni Guda, agad niyang ini-report sa pulisya ang nadiskubre.

Sinabi ng QCPD-CIDU na kinukunan na nila ng pahayag ang mga nakatira sa nasabing bahay gayundin ang may-ari nito.

Isasailalim din sa DNA tests ang mga buto.

Patuloy pa ang isinasagawang imbestigasyon ng pulisya.