DSWD magsasagawa ng re-assessment sa mga benepisyaryo ng 4Ps

PAG-AARALAN muli ng Department of Social Welfare and Development (DSWD) ang mga benepisyaryo ng Pantawid Pamilyang Pilipino Program (4Ps), na tinaguriang “non-poor” ng Listahanan 3 na standardized targeting system na ginagamit ng programa.

Ito’y matapos na ipinahayag ni DSWD Sec. Rex Gatchalian ang kautusan para sa re-assessment.

Bilang bahagi ng proseso, gagamitin ng DSWD ang Social Welfare and Development Indicator (SWDI) tool upang masuri at masubaybayan ang antas ng kondisyon ng pamumuhay ng mga sambahayan ng Pantawid Pamilyang Pilipino Program 4Ps.

Ang Social Welfare and Development Indicator ay ginagamit ng Departamento bilang isang pamamaraan sa pamamahala ng kaso upang matukoy ang pag-unlad ng mga sambahayan.

Sa pamamagitan ito ng pagsukat ng kanilang ‘well-being’ sa mga tuntunin ng economic sufficiency at social adequacy.

Habang pinangangasiwaan ang Social Welfare and Development Indicator, hinimok ng DSWD ang mga kinauukulang benepisyaryo na ipagpatuloy ang pagsunod sa mga kondisyon ng programa hindi lamang para sa mga cash grant kundi para sa kapakanan din ng kanilang mga anak at pamilya.