Lakers inangkin ang No. 7 spot sa playoffs

KUMANA si LeBron James ng 30 points at 10 rebounds upang akayin ang Lakers sa 108-102 overtime victory laban sa Minnesota Timberwolves sa play-in tournament.

Inangkin ng Los Angeles ang seventh spot sa Western Conference playoffs at lalabanan ang second-seeded Memphis Grizzlies sa first-round series.

Kumamada si Dennis Schröder ng 21 points kasama ang dalawang free throws sa huling 8.4 segundo ng extra period na sumelyo sa panalo ng Lakers na nakabangon mula sa double digit deficit.

Kumolekta si Anthony Davis ng 24 points at 15 rebounds para sa La­kers at sinamantala ang one-game suspension ni Rudy Gobert sa panig ng Timberwolves.

Hahamunin ng Timberwolves ang mananalo sa New Orleans Pelicans at Oklahoma City Thunder para sa No. 8 spot at makikipagtuos sa No. 1 Denver Nuggets sa first-round series.

Sa Miami, umiskor si Trae Young ng 25 points para igiya ang Atlanta Hawks sa 116-105 pagdagit sa Heat sa play-in tournament at sa pagbulsa sa No. 7 spot sa NBA Eastern Conference playoffs.

Tatapatan ng Atlanta ang No. 2 seed Boston Cel­tics sa Eastern Confe­rence first-round playoff series.

Sasagupain ng Miami ang mananaig sa pagitan ng Toronto Raptors at Chicago Bulls para sa No. 8 berth na haharap sa top overall seed Milwaukee Bucks sa first-round series.