Kinatawan ng Asean Para Games 2023, suportado ni Mayor Along

Ipinahayag ni Caloocan City Mayor Dale Gonzalo “Along” Malapitan ang kanyang buong suporta kay G. Rodrigo Podiotan, isang residente ng Caloocan City at isa sa mga opisyal na kinatawan ng Pilipinas sa 2023 Asean Para Games na gaganapin sa Phnom Penh, Cambodia.

Sasabak si G. Podiotan sa 100-meter dash event (Men’s Category) kung saan nanalo rin siya ng silver medal noong nakaraang taon.

Upang matulungan si G. Podiotan sa kanyang paglalakbay, nagbigay ang Pamahalaang Lungsod ng Caloocan, sa pamamagitan ng Persons with Disability Affairs Office (PDAO) kay G. Podiotan ng bagong wheelchair.

Bukod dito, nagpaabot din si Mayor Along ng suportang pinansyal para sa kanyang pagsasanay at iba pang kaugnay na gastusin. Pinuri rin ni Malapitan si Mr. Podiotan at hilingin sa kanya ang pinakamahusay sa kanyang paparating na kompetisyon.

“Buo po ang ating pagsuporta. Hinahangaan ko po ang iyong pagsisikap at dedikasyon sa larangan ng palakasan sa kabila ng inyong kapansanan. Good luck at ipagmalaki kami, Batang Kankaloo!” sinabi ni Along.

Kinilala rin kamakailan si G. Podiotan bilang isang espesyal na awardee ng Outstanding Citizens Award, ang pinakaprestihiyosong pagkilala mula sa lokal na pamahalaan para sa kanyang mga kontribusyon sa larangan ng sports at sa pagiging inspirasyon sa lahat ng taong may kapansanan.