PH archers sasabak sa Paris Olympics

LIMANG international tournaments ang nakalinya para sa Filipino archers ngayon taon, kabilang ang 3 qualifying para sa 2024 Paris Olympics.

Ang World Archery Championship sa Berlin,Germany (july 31 to August 6) 19th Asian Games sa Hangzhou, China (Sept. 23 to Oct. 8) at Asian Archery Championship sa Bangkok,Thailand (Nov. 4 to 12) ang magbibigay ng ranking points ng slots para sa susunod na Olympics.

Ang national team ay lalahok rin sa Asia Cup Leg 1 sa Chinese Thaipei sa Marso 14 hanggang 19 at Leg 3 sa Singapore sa June 5 hanggang 10 bilang bahagi ng kanilang paghahanda para sa Asiad.

Nakaraang taon,anim na atleta ang dumako sa South Korea para sa World Archery Asia joint training at Asia Archery Challenge.

Nasungkit ni Gabrielle Monica Bidaure ang silver medal sa women’s recurve event sa Gangwondo province sa likuran ni hometown bet Nam Su Hyun Nam.

Ang kanyang kapatid na babae, Pia Elizabeth Angela, dumalo rin sa training camp kasama si Phoebe Nicole Amistoso, Damariz Gabrielle Calera,Jason Emmanuel Feliciano at Riley Silos.

Samantala, ang 17th Philippine Archery Cup Leg 1 at ang 2022 Philippine Archery Cup finals ay gaganapin sa Enero 20 hanggang 22 sa STI Gold Toe Archery Center sa Barangka, Marikina City.

Ang Philippine Archery Cup ay itatampok ang 50-meter barebow, para at compound, at 70- meter recurve events sa men’s at women’s division.