P2m shabu nasabat sa 10 tulak sa Rizal

HUMIGIT-KUMULANG sa P2 milyong halaga ng shabu ang nasamsam sa 10 katao sa buy-bust operation sa Cainta, Rizal nitong Sabado, Disyembre 4.

Kinilala ang mga dinakip na sina Mraco Angelo Zarate, 46 anyos; Twixx Leyson, 30, call center agent; Angeito Reyes, 39, driver; Dennis Reyes, 36, driver; Christian Evangelista, driver; Victor Dax Jose, 49; Roderick Rendal, 54; Janeth Salasibar, 51; Marry Lou Cruz, 51; at Allan Garol, 51.

Isinagawa ang operasyon ng Special Operations Unit-4A na pinangangasiwaan ni Police Brig. Gen. Remus B. Medina, direktor ng Philippine National Police Drug Enforcemnent Group (PNP-DEG).

Nakiisa sa drug bust ang mga operatiba mula sa Regional Drug Enforcemnet Units ng National Capital Region Police Office Station, at Taytay City Police Station.

Nakumpiska sa mga suspek ang 300 gramo ng shabu, P1,000 bill na ginamit bilang buy-bust money, isang puting Honda City na kotse at limang cell phones, ayon sa PNP-DEG.

Itinurn-over ang mga suspek at ebidensya sa PNP-DEG Special Operation Unit 4A Office para sa dokumentasyon, disposisyon, at pagsasampa ng mga kaso. (Edwin Moreno)