Gari Escobar guest ni Diane de Mesa sa ‘Notes From The Heart’

NAGPAHAYAG ng kagalakan ang talented singer/composer na si Gari Escobar sa pagiging special guest niya sa radio show ni Diane de Mesa sa DDM Studio LIVE na Notes From The Heart.

Ito ay magaganap sa January 22 @ 8pm (California)/ January 23 @12pm (Manila).

Pahayag ni Gari, “Natutuwa po ako kuya Nonie, new experience ito para sa akin. Kilala ko na po si Ms. Diane dahil nagkasabay kami ng guesting sa Letters and Music last year nang bumisita siya sa bansa.

“I really look forward to working with other artists like her. Sa January 23 yung guesting ko sa radio show niya. Two songs ang ni-ready ko kuya para sa kanyang show.”

Ano ang masasabi niya kay Ms. Diane?

“Friendly po si Ms. Diane at very talented, plan po namin na mag-collab sa California kapag puwede na. Meanwhile ay digital muna po ngayon,” saad pa ng Breakthrough Artist of the Year winner sa nakaraang Aliw Awards.

Sa panig naman ni Ms. Diane, na isa ring Aliw awardee na tumanggap ng Special Award as International Multimedia Talent of the Year, nabanggit niya sa amin ang naturang guesting ni Gari.

Lahad ni Ms. Diane, “Special guest ko si Ka-Gari sa radio show ko sa DDM Studio LIVE, “Notes from the Heart”. Sa Jan 22 @ 8pm (California)/ Jan 23 @12pm (Manila). Bale interview ito, tapos kakanta rin siya nang live and I’ll play his songs also. Sa FB Live ito mapapanood.”

Aniya pa, “It’s my weekly radio show as DJ Diane. I sing few songs live, but mostly play my official music videos. I also feature indie artists and musicians, songs and music videos. Talents from US, Philippines and global sa FB live.”

Bukod sa pagiging mahusay na singer/composer, si Ms. Diane ay isa ring frontliner at kabilang sa mga ipinagmamalaking Pinay nurse sa Amerika.

Anyway, muling mapapanood sina Gari at Diane sa Aliw Awards Congress Highlights 2020-A Post-Production Presentation for Facebook Live! Ito’y magaganap sa Feb. 5 sa California at New York, at February 6 naman sa Pinas.

Host dito si Ms. Diane at ang AALIWIN Kita weekly special host na si Birdie Reyes III. Special guests naman sina Gari at Khenzuya Yamamoto na Aliw Special Awardee for Artistic Excellence. Pag-uusapan dito ang winners and behind the scenes sa nasabing event.

Incidentally, ang na-postpone na Mga Hugot ng Puso virtual concert ni Gari last December 30 ay posibleng sa February na gawin.

Saad ni Gari, “Bale, hindi po matutuloy ang virtual concert, kasi yung isang band member po ay na-food poison, pati mga anak niya at asawa. Kaya ini-request nila na i-postpone ang concert.

“So, tentative po na baka gawin na lang itong Valentine show, na tamang-tama po sa title niya. Siguro either February 14 or 21 po, inaayos pa po ang venue.”