Mga de-kalibreng pelikula, kaabang-abang sa PPP4

Ni ARCHIE LIAO

WALA nang papipigil pa sa pag-arangkada ng ika-4 na edisyon ng Pista ng Pelikulang Pilipino na gaganapin mula Oktubre 31 hanggang Nobyembre 5.

Bukod sa nauna nang naianunsyo, 23 pang de-kalibreng pelikula ang nadagdag sa lineup ng pinakaabangang film festival ng taon.

Dalawa rito ay mula sa Regal Films at 21 ay galing sa ABS-CBN Films.

Kung susumahin, ang kabuuang bilang ng mga pelikulang tampok sa pinakabonggang selebrasyon ng taon ay aabot sa 168  na, kung saan 90 ay full-length features at 78 ay shorts.

Ang horror film na “Aswang” nina Peque Gallaga at Lore Reyes at ang Chito S. Roño drama na “Signal Rock” ay mula sa Regal Films. Ang “Aswang” ay nasa Genre section at ang “Signal Rock” ay nasa Pang-Oscars section.

Dalawa sa pinakaaabangang ABS-CBN titles sa PPP4 ay ang “Transit” ni Hannah Espia at “Sila-Sila” ni Giancarlo Abrahan. Nasa Pang-Oscars section ang “Transit” habang kabilang ang “Sila-Sila” sa pinakabagong PPP Premium Selection titles kasama ang restored version ng “Markova: Comfort Gay” ni Gil Portes at “Metamorphosis” ni J.E. Tiglao.

Tatlong restored na obra ng National Artists for Cinema ay idinagdag sa Classics section: “Banaue” ni Gerardo de Leon, “Ganito Kami Noon, Paano Kayo Ngayon?” ni Eddie Romero, at “Anak Dalita” ni Lamberto V. Avellana.

Ipalalabas nang libre ang “Anak Dalita” bilang bahagi ng Sagip Pelikula Advocacy Campaign ng ABS-CBN na may pakikipagtulungan sa LVN Pictures, Inc. upang mapanood ito nang mas nakararami.

Ilan sa mga pinakamamahal na Star Cinema romantic films, na restored versions din, ay kabilang na sa PPP4. Ang mga ito ay ang “A Very Special Love” ni Cathy Garcia-Molina tampok sina John Lloyd Cruz at Sarah Geronimo, “Kailangan Kita” ni Rory Quintos na pinagbidahan nina Aga Muhlach at Claudine Barretto, at “Sana Maulit Muli” ni Olivia M. Lamasan tampok sina Muhlach at Lea Salonga.

Samantala, ang King of Comedy na si Dolphy ay kasama sa Tribute section sa pamamagitan ng restored na “Captain Barbell” ni Jose “Pepe” Wenceslao.

Wika ni FDCP Chairperson at CEO Liza Diño, “The PPP4 is a show of solidarity as it gathers 168 films in a grand showcase of Philippine Cinema. I am delighted that the PPP spirit is embodied in this year’s online edition as it brings together the industry and community in one platform to promote the appreciation for Filipino films and help provide support to the film industry badly hit by the pandemic.”

Inaanyayahan ng “PPP4, Sama All!” slogan ang filmmakers, audiences, at iba pang stakeholders ng FDCP na makiisa sa industriya habang patuloy na kinakaharap nito ang COVID-19 na krisis.

Idinagdag ni Diño na 100% ng proceeds mula sa sales ng PPP4 Festival Passes ay mapupunta sa producers ng kasaling full-length films.

Heto ang 23 na karagdagang pelikula sa PPP4, na gaganapin mula Oktrubre 31 hanggang Nobyembre 15 sa FDCPchannel.ph platform:

PPP Premium Selection (“Sila-Sila” ni Giancarlo Abrahan,“Markova: Comfort Gay” (restored) ni Gil Portes,“Metamorphosis” ni J.E. Tiglao), Romance (“A Very Special Love” (restored) ni Cathy Garcia-Molina,“Kailangan Kita” (restored) ni Rory Quintos, “Sana Maulit Muli” (restored) ni Olivia M. Lamasan),

Youth and Family (“Pare Ko” (restored) ni Jose Javier Reyes,“RPG Metanoia” ni Luis Suarez, “Paglisan” ni Carl Papa)

Classics (“Anak Dalita” (restored) ni Lamberto V. Avellana (nasa free tab),“Banaue” (restored) ni Gerardo de Leon ,“Ganito Kami Noon, Paano Kayo Ngayon?” (restored) ni Eddie Romero)

Pang-Oscars (“Signal Rock” ni Chito S. Roño,“Transit” ni Hannah Espia,“Dekada ’70” (restored) ni Chito S. Roño,“Anak” (restored) ni Rory Quintos)

Genre (“Aswang” nina Peque Gallaga at Lore Reyes), Bahaghari (“Miss Bulalacao” ni Ara Chawdhury,“Esprit de Corps” ni Auraeus Solito)

Tributes (“Captain Barbell” (restored) ni Jose “Pepe” Wenceslao (for Dolphy), From the Regions (“Ang Damgo ni Eleuteria” ni Remton Zuasola), Documentaries (“Dahling Nick” ni Sari Dalena, “Forbidden Memory” ni Teng Mangansakan).

Ang PPP4 ay may subscription options gaya ng Premium Festival Pass (PHP 599) na magbibigay ng access para sa 16 na araw sa lahat ng content, kasama ang Premium films at events. Ang Early Bird Rate period, na inaalok ang Premium Festival Pass sa halagang PHP 450, ay extended hanggang Oktubre 25.

Simula Oktubre 31, iaalok ng PPP4 ang Half Run Pass (PHP 299) para sa walong araw, Day Pass (PHP 99), at Free Pass (para sa short films, public events, at iba pang libreng content). Ang persons with disabilities (PWDs) at senior citizens ay makakakuha ng 20% discount at ang mga mag-aaral ay magkakaroon ng 30% discount.

Ang PPP ang flagship event ng FDCP. Ang Event Partners nito ay Glimsol Web & Digital Solutions, Team On Ground, at Dragonpay na official payment gateway ng PPP4.

Ang Early Bird Rate period para sa PPP4 Premium Festival Pass ay extended hanggang October 25.