Kaya swak sa role… Sanya naging yaya ng mga batang pinsan

Ni GERRY OCAMPO

IPINAKILALA na si Sanya Lopez bilang leading lady ni Gabby Concepcion  sa  teleseryeng  First Yaya na tinanggihan ni Marian Rivera dahil hindi  kaya  ang lock-in taping.

Handang-handa  na  nga si Sanya  para  sa napakagandang break na ipinagkatiwala sa kanya ng GMA 7.

Matatandaang unang nabigyan ng break si Sanya sa show ng yumaong German Moreno. Mula sa That`s Entertainment ay nagkasunud-sunod  na ang proyekto ni Sanya.

Napansin ang acting ni Sanya nang gawin ang Haplos, Cain at Abel, at  Dahil sa Pag-ibig.

Napa-wow pa si Sanya nang malaman na makakatrabaho pa niya si Gabby sa “First Yaya.”

Naipagtapat  din ni Sanya  na nakaranas na rin siyang maging yaya ng kanyang younger cousin (tatlong pinsan daw ang kanyang inalagaan).

“Sa  tulong ni Direk LA (Madridejos) at ng buong production ay nasa  proseso  pa po ako ng pagkilala  kay Yaya Melody para mabigyang buhay  at hustisya  ko  po ang kanyang  pagkatao. “Yung buhay ko noon sa Pulilan, Bulacan ay mayamang  source  ng inspirasyon, lalo po at  naranasan  ko  ring  mag-alaga  ng mga pinsan na mas  bata  sa akin,” pagtatapat ni Sanya.

Makakasama nina Sanya at Gabby sa serye sina Ms. Pilar Pilapil, Cassy Legaspi  at Joaquin “JD” Domagoso.

***

ANG October ay  Mental Health Awareness Month at ipinararating  ng  karamihan  ang   epekto  sa tao kapag  hindi  nabantayan ang  kalagayan  ng  kanilang  pag-iisip.

Dahil  nga sa pandemic na Covid-19 ay nakaranas ang maraming tao  sa  buong mundo  ng depression, anxiety, restlessness at yung iba ay  umabot  pa sa pagpapatiwakal.

Isa  nga sa binabantayan ang kalagayan  ng  kanyang  mental health  ay  ang comedian na si Betong Sumaya. May pinagdaanan  na matinding  anxiety  si Betong  noong magkaroon ng lockdown.

Para  mabawasan  ang anxiety  ay  iniiwasan  daw muna  niya  manood  ng  mga balita sa telebisyon.

“May  times na ayoko  manood  muna  ng news. Hindi ko sinasabi na  hindi  importante, napakaimportante  ng  news. Pero may point  minsan  na parang  naa-alarm  ako.  Kasi parang  nakikita  mo   yung  cases  nararamdaman  mo,” pahayag ni Betong.

Nakatulong  kay Betong ang pagdarasal para mapawi ang  nararamdamang  lungkot  at  takot.

“Yung  faith  mo  talaga  kay  Lord, wala tayong  ibang  makakapitan  ngayon  kung  hindi  si Lord  talaga di ba,  sa  rami  ng nangyayari  sa  atin.”