Kathryn inamin, pakakasal na kay Daniel

Ni GERRY OCAMPO

INABANGAN ng KathNiel fans ang pahayag nina Daniel Padilla at Kathryn Bernardo sa TV Patrol tungkol  sa kanilang pagpapakasal.

Nabulabog  ang  buong KathNiel  fans at followers nang mag-upload  ang  ina ni Daniel na si Karla Estrada at ina ni Kathryn na si Min Bernardo ng wedding gown at wedding invitation.

Natural na natuwa at na-excite ang lahat dahil hula nila ay ikakasal na nga ang dalawa.

“We`re  getting  married!” sabay na pahayag ng dalawa.

Ito  raw ay magaganap sa pinakabago  nilang  project  under Star Cinema na may titulong  “The House Arrest of Us” na first  digital  movie  series ng nasabing production outfit. Paglilinaw na hindi raw ito sequel ng blockbuster movie nilang 2 years ago na “The House of Us.”

Ang kuwento ng The House Arrest of Us ay  isang romantic family digital  movie  series na tungkol  sa dalawang  tao na  na-lockdown  kasama  ang kani-kanilang pamilya. May 13 part ang serye na  nagsimula  nang  mag-shoot.

Ito na rin ang first project nina Daniel at Kathryn under new normal  at  aminado  ang dalawa na challenging sa lahat  at sa buong team.

“Kakaiba  yung  experience  na  nandito kami  sa parang  village style, subdivision, parang  kaming  nasa bubble lang din na walang puwedeng  lumabas, wala ring puwedeng  pumasok. Kami-kami lang din yung  nandito and  astig-astig din niya,” say ni DJ

Ayon pa kay Daniel, kaya raw nila ginawa ang project  ay para mabigyan  ng  kasiyahan  ang mga tao sa panahon ng pandemya.

“Ngayon sa panahon natin  na ang daming  binibigay  na  pagsubok  at  problema, gusto nating magbigay  ng  ngiti,” say  pa ni Daniel.

Magsisimulang  mapanood na raw ang bagong digital movie series nina Daniel at Kathryn sa October, kasama sina Dennis Padilla, Ruffa Gutierrez, Gardo Versoza, Hyubs Azarcon at Herbert Bautista.