“Whole-of-nation” approach vs COVID-19, isinusulong ni Sen. Go

IGINIIT ni Senate Committee on Health Chairman Christopher “Bong” Go na kailangan ang “unified” whole-of-nation approach para mapalakas ang paglaban ng bansa sa COVID-19 pandemic.

Sa virtual meeting kasama ang mga top government officials at mga kinatawan ng medical at business sectors, sinabi ni Go na kinikilala ang halaga, karanasan at kaalaman ng mga ito sa laban sa pandemic kaya naman siniguro niya sa mga ito ang kahandaan ng pamahalaan na pakinggan ang kanilang mga payo.

Sinabi ni Go na maging siya ay hindi naman eksperto sa larangan ng kalusugan kaya gagawin niya ang kanyang makakaya para bigyan ng boses ang mga health expert para makabuo ng pambansang estratehiya para labanan ang COVID-19.

Kinilala rin ni Go ang ambag ng business sector at ang medical community sa promotion at protection ng kapakanan ng mga kapwa Pilipino.
Binigyang-diin ni Go na walang katumbas ang sakripisyo ng mga medical frontliners para malampasan ang pandemyang dulot ng virus.

Dagdag ni Go, dapat din pasalamatan ang business sector dahil sa pakikipagbayanihan at pakikipagtulungan sa pagtugon ng gobyerno sa pandemya.

Malaking tulong aniya ang tulong ng dalawang sektor para sa paglaban ng pamahalaan sa COVID-19 maging sa paghahanda sa long-lasting recovery at sustainable future. (Mylene Alfonso)