Actor Matt Evans nagpiyansa na sa ‘child support’ case

NAKAPAGPIYANSA na ang aktor na si Matt Evans matapos arestuhin nitong nakaraang linggo dahil sa reklamong may kinalaman sa child support.
Nitong Biyernes, Hulyo 31, hinuli si Evans ng mga pulis sa kaniyang bahay sa bisa ng warrant of arrest sa kasong paglabag sa Anti-Violence Against Women and Their Children Act of 2004, kaugnay ng ‘di pagbibigay ng suporta sa anak nila ng dating partner na si Johnelline Hickins.
Ayon kay Evans, huli niyang nakita ang anak sa ex-girlfriend noong 10 buwan gulang ito pero nagpapadala daw siya ng suporta.
“Oo nagsusuporta ako. Pero dahil nga sa nangyaring pandemyang ito, may lapses ako ng suporta,” ani Evans.
“May mga lapses [din] tayo dati kasi nga hindi naman tuloy-tuloy trabaho natin tapos ‘yong pinagkakakitaan ko naman outside showbiz hindi rin naman kalaki,” dagdag niya.
Hindi pa klaro ang mga susunod na legal na hakbang ni Evans.
“Ang gusto kong i-clarify bakit kailangan umabot pa sa ganito? Puwede naman pag-usapan,” aniya. “Nananahimik na ako. May asawa ako, 7 years na akong happily married with three kids.”
Taon 2013 nang ikasal si Evans sa misis niyang si Katrina Fariñas.
Noon 2012, kinasuhan ni Hickins si Evans ng slight physical injuries. Nakulong ang aktor at nakapagpiyansa, at kalaunan na-settle din ang kaso.(PTF team)